Tuni ka ci nuam mello in, ka assignment bawl ding honkhat ka neih tawh, ka makaipa kiang,
"Sia aw, ka ci nuam mel kei, ka khuasik keei in, i nasep lah a tawm lel tawh, ka na ciah thei ding hiam" ci'n ka gen khualkhual leh
"Aw, tua bang a hih leh, ki ngah lua ei, va ciah lel in la, zingciang nong kuan zawh kei ding leh kei ong zasak kik in"
ong ci in, tua teng tawh, ka nasepna Crete, NE pan, ka omna Lincoln, NE `ka motor Toyota Camry lui/tek 1998 a pangdeppi tawh ka ciah suak hi. Inn ka tun tak ciang in, hih bang aa, ka ci na suak leh piang peuh mah lo ding, ka hih teh ci-in, "Exercise" ka theih tawp teng ka khua-ul kai dong ka hih khit tak ciang in, "Refresh" kik theih nang ci'n, ka kisil semsem hi. Tua khit zawh teh, ka om ong nuam zaw deuh in, ka laibawl ka kipan hi.
"Nasep Full-Time, sangkah tawh thuah zong, a baih hi kei zen ei maw" ci-in kei leh kei ka ki cici kha zel. Innkuan leh naute mailam ding etkul lai hi mawk a hih teh, bang zah ta in, a hamsa zong, awlmawh kei phot ning ei, ka na ci zel hi. Ka laibawl kawmkawm, ka mit ong kham in, ka email ka check vat leh, khuapih pawl khat na online zihziah leh kilawm, ka pusuak kik mai. Ka khuaNet ah lai ka at sawm nawn kei phot ta dih hi. Nidang in, mipil khua hi kha mah nung in, tun bel a hih leh, mihai khua tawh a ki lamdang khol tam thei keng.
Tua leh, net khat pan, "God-Breathe Music Group" ka va mu kha dihdih aa, ka va et leh, Gospel Song, Pasian la bekbek a sa, kawlgammi pawl khat te ii Band khat na hi in, tua ah Po Dali Thei Than zong ki hel aa, a pasal Ko Nyi Nyi pen Manager na hi sawnsawn lai hi. Ma Po pen, 1996 ka tan 7 kum aa, hoih ka sak mahmah lasiam khat hi in, "Saw Bweh Mu" phawkna tawh a lasak kik uh a hi, "Maa Deh Phet Ma" series bang tudong ciang mah ngaihnop ka sa lai hi. Tuma kum 15 kimpawl aa hoih ka sak mahmah Ma Po in, Pasain la bekbek tawh, na ong sep tak ciang, a mel mahmah zong, hoih ka sa tektek mawk hi.
Tua zom ah, a mau website pan ka muh khiat, "Myanmar Christian Radio" ka va muh toto' lai tak ciang in, tuni ka ciahbaih, naitawm, sumtawm ding, cih lunghihmawhna tuamtuam te in, a ong vuknelh kimlai, thupha a sang in, ka ki tuat zaw hi. Kei mah bang aa, online Radio a lunglut i om khak zenzen ding leh, ci-in, ka khuaNet ah, ka at sawm leh, ka tha dah kik in, ka blog ah, a ong at ka hi ta mai hi. Online tung pan, email check kawm, chatting bawl kawm in, Pasian la te ngai kawm in, tha la ciat ni ei ci-in, a nuai ah, a link kong khak hi.
