-------------------------------------------------------------
June 21st 2009, Father's Day, Pa-te-ni, Pa te khempeuh zahtakna tawh
-------------------------------------------------------------
"A khiat-na mahmah om kei...amau hun lai in zong, a ut bangbang vua a om uh, hi na pi'n, ei ciang aa, tua ci lo ding, hi ci lo ding....
Tua ci buang ve....na tua cih khial teh....cih bang, thukham tam lua, ong hehpih lo lua hi lel..."
"Lawm-ngaih nei thei lo ding, naupang lua lai teh" ....amau hun lai aa zong, lawm-ngaih a nei hi na pi'n, ei ciang aa, nei thei lo ding cih bang......
"Tha-dah lo ding....tha-dah ten, lai thei lo ci"....amau zong, ko kum zah a phak lai un, laisim ding, a tha-dah vive mah hi lo maw.....
"Sum khol ding...mawk zat lo ding.".....thugen siam mahmah..amau sum a na khol lo' man leh, a utut vua, a na zat man vua, ei hi bang likliak aa, a om kha, i hi ta ve....."
"Zuu dawn thei lo ding maw, ka ta" Pa zong, zuu kam-nam sa aa, kei thu hilh aa, ong ki nei hi lo dia....
"Za tep cih khawng a hoih hi peuh mah lo" A ang-aip sung aa, zatumbang pawl khat tawh, za tep hoih lo ci aa, ong sermon ke mawk...hai vai sa lel tak ingh.....
Pa ten ta te thu hilh....ta ten, "san theih lo ding bekbek"
Pa te thu hilh na...pai khat sa lua...
Ong hehpih thei lo hi mai uh..a utut bang vua, a gamtat khit uh ciang, ei hun teh, i sep nop, i hih nop, ong phal nop lo'...a ngeina mahmah om kei...
------------------------------------------------------
Tu-ni in, ka sim ngei tangthu tomno khat
**********
Nitak khat, dum tung khat pan, mi pawl khat in, tua dum sung, na en ngeingai uh hi..... A ki ho na te uh: " Kalai..kalai...dum sung aa, a phia daldal te, Kham/Gold hi lo maw"...
"Hi ken teh...suang manpha hin teh"..."Ken bel Ngun/Diamond hi in, um ingh."
dum tung, a kim a paam pan aa, a en te in, gen lamlam mai uh. A vekpi mah vua zong, uap-nap na lungsim leh mit hek tawh, hi gai mai.Tualaitak lian aa, mipa khat zong, thu gen kawmkawm leh, dum sung tuah sawm vat, tua leh,
" Hei..nang tuak thei lo ding...kei a tung masa hi lo ka hiam...kei ka tuah phot a kul masa ke"
.."mawkmawk....tua dan na cih tak in, kei ka tuak masa kei ding maw, hih dum ah, nang sang, kei a tung masa ka hi ta ve"
...pau lo phun lo aa, mipa khat "Phek..sa aa" dum sung a tuak takpi hi ta.. .
????? dum nuai a tung tak ciang aa....den-a, a phia daldal te, Kham/Gold lah hi lo, suang manpha lah hi lo...Ngun/Diamond lah hi lo..."Gul(mualtan)" honpi na hi mawk. Kham/Gold a bang, a phia daldal cih pen, tua gul honpi ii "mit", a te daldal na hi.
Dum tung aa om te kiang, gen ke sam :
...." Ong tuak suk nawn peuh mah kei vo, ih um mawh bang dan te hi peuh mah kei..Gul(mualtan) honpi hi...amit a te daldal te pen, en suang manpha khawng peuh a sa khial hi hang"
.....dum tung aa ten, um tuan lo, " hih mipa in, a vek aa, la nuam a hih man aa, ong khem hi"
..midang khat tuak suk leuleu..
" Ka lai ka lai, hi mah ei...ong tuak suk nawn kei vo, Gul(mualtan) honpi hi...tua te pen, en suang manpha khawng peuh a sa khial hi hang"
...dum tung aa ten, dum sung aa te, thu-gen um tuan lo: ,
"hi gel peuh mah, a mau gel bek in, a lak gai'h nop man hi ding hi..ong khem hi"
...cih teng tawh...khat khit khat...tuak suksuk, tuak suksuk!!!
...dum tung aa teng khempeuh, dum sung ah, khat khit khat, Gul(mualtan) gu tawh ong si gai, a nuntakna te uh, ong bei gai ta hi.
-----------------------------------------------------------------------
Kum 4 ka phak lai in: Pa'n, na khempeuh thei!!!!!!!~
Kum 5 : Pa'n na za tampi thei!!!!!!!
Kum 6 : Ka Pa, na Pa sang' pil zaw!!!!!!
Kum 8 : Pa'n, na khempeuh thei khin taktak kei veh aw!!!!!
Kum 10 : Pa khang-lui mi lua, a mau khan lai hun leh tu hun, bang ki-teh thei mah ding, ki lamdang lua ta!!!!
Kum 12 : Ka Pa'n bang mah a thei lo ding mah hi..a neu lai hun te, a phawk kik nang, a mah, hamlua,tek lua, a thei nawn lo ding mah hi.!!!
Kum 14 : Pa thu, man mahmah ding hi kei. Ong thu gen te hai vai lua!!
Kum 21 : Kalaisai, ka Pa, bangmah in, a ki zat thei'h nawn lo' pi, lungkham huai zawzen ei..Topa!
Kum 25 : I Pa'n hih thu thei kha ding hi veh aw, a man, na tuak mun mahmah ding hi ven
Kum 30: Guai..i Pa ngaihsutna dot huai sa mahmah ingh. Dong phot hamtang ni, a muh, a tuah, a theih tam mahmah hi...
Kum 35: Pa, ong thukimpihna lo tawh, bang mah ka sem kei ta mai aa.
Kum 40 : Aw, hih vai peuh mah, Pa bang hi leh, bang ci bang in, a gel tam maw..Pa bel a pil, a cim mahmah hi mawk ei.
Kum 50: Hiim.. i Pa a dam lai bang hi leh, a duhduh, a deihdeih pia nuam tak ingh..hih bang aa, ka gentheihna, hamsatna te khempeuh, Pa tawh kikum thei ding. Pa a dam lai aa, ka thusim khak lo' mahmah, ki sik kik taktak zen sing..Pa kiang pan, a theih huai thu tampi, ka sin ding, Pa thupha tampi a kisam ka hi zen mawk ve maw.!!!!
-----------------------------------------------------------
P.S
Pa te'n ong thuhilhna, ta ten, limtak in, i ngaihsut mahmah ding, kisam!. Hih a tung aa mi te khempeuh, a thei masa te, thu gen mang in, hi le uh, a nuntakna te uh, Gul(mualtan) gu tawh, ong bei nai lo thei ding aa maw..
Leitung ah, neihlehlam, sumlepaai cih te, ki zong kik thei, zileta, lawmlegual cih te, ki nei kik thei, pilna siamna ki sin kikkik thei(lunggulhna i neih nak leh), a dangdang te zong, ki ngah kikkik thei......!!!
NulePa ki nei kik thei lo, a thei lo om lo, a thei khin zo/a zahtak khin zo/a lungkim sak khin zo, tam lo
NulePa a lungkim sak tawntung te, a daupai lo om lo cih thu zong, a thei lo, om tuan lo....
Tu-ni, Pa te ni ah, I theih sa thu te, ei leh ei, ki remind kik in, i leitung Pasian a hi, i NulePa kiang pan, Nu thupha, Pa thupha tawh, a mazang daupai, gual eng lo i suah theih nang, Pa te kiang pan, thupha ngen tek ni.
By Nicholas Pau
Ref:
My Father by Ann Landers
